زهر البرتقان

من طرف **yousseffayid** الإثنين أغسطس 22, 2011 7:24 pm

حتي انت هتســيبــني
.....

والخطوط معوجة مش
عدلة

اتغرب ما بين الصبح
والتاني

ارقص علي فروع الشجر
وكأني عصفورة

مع ان قلبي اتوجع م
الهم ويعاني

.............

كُتر الالم ع الضَهر
بيصعّب الشيلة

كُتر الكلام ف
الضُهر بينشف ف ريق الناس

يندس حلمك ما بين
الكره والماضي

حتي السلام بالأيد
مكتوب عليه سعره !!

يمكن ما تقدرش
الهدوم تخبــينا

لكن نبات والقلب
متغطي

..............

يتمرجح سؤال كما حبل
متدلدل

احنا انتصرنا بصحيح
.. ولا اتغدر بينا ؟

صعب السؤال بحقيق

وأيش مرره ف
الريق ؟

قالك دا الفؤاد حاسس

مقصوص وضايع نُص
الكلام منه

حرااق سكاتك .. انطق
اتكلم

ما تسبـش مطرح لحز
الخنجر الحامي

تشهد عليك لمعة
الفضة

تشهد عليك الصورة والبرواز

بروز ف ريش الحمام
... يمكن ترفرف صوت

عبي القمر ف الكفوف
.. ينفرد عودك

لو صادق صحيح ؟ ... احلم بالنبات لاخضر

اصلك لحقت القطر م
النجمة

يبقي ما تخليش مكانك
يسكنه البوم والبنادق

لحسن يموت الورد تحت
رجلين العساكر

ترجع تقول يا ريت..
ما كان وما كنا

ما حدش هيعشق سكتك
غيرك

أمّــال ايه اللي
يفرق بين القعاد والسفر ؟

ما اللي راح ما رجعش
ضايع

ينفرط سلسال القصد
والنية

وما عدش ينفع معاه
الندا والبحلقة

إغضب كموج البحر

وإحلم كزهر البرتقان
.

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

نوفمبر 2001

ــــــــــــــــــــــــــــــــــــــــــــــــــــــــــــــــــــــــــــــــــــــــــــ