شمس بكرة فى قلب الميدان ..جمعة الوحدة و الانتفاضة

من طرف فوكس الثلاثاء مايو 17, 2011 8:32 am

الجمعة (13 مايو 2011).. مئات الاف من المصرين نزلوا التحرير وصلـّوا الجمعة هناك فى مشهد فكرنا بايام الثورة العظيمة ... عشان يأكدوا الوحدة الوطنية بين ملسمى مصر و اقباطها و عشان يدعموا الانتفاضة الفلسطينية الثالثة اللى بدأت بدعوة شباب على الفيس بوك بعمل انتفاضة و الزحف من كل الدول العربية نحو غزة و فلسطين .. و صلاة فجر جمعة دعم الانتفاضة و الوحدة الوطنية ...كانت صلاة فجر مليونية .. اتجمع فيها الشباب و الكبار فى اكبر المساجد فى كل المحافظات .. و من قلب التحرير اتكلمنا مع المصريين اللى كانوا هناك ..
هانى عبد الراضى ( 22 سنة ) و كريم كرم (27) و ياسر الشلقامى (27) .. هما من اتحاد الشباب الاشتراكى ونازلين عشان يأكدوا على الوحدة الوطنية و يدعموا الانتفاضة الفلسطينية الثالثة .. وبالنسبة لفكرة الزحف لغزة.. كان رأيهم انهم هيكونوا فى غزة يوم الاحد (15 مايو) و هيزحفوا لمعبر رفح و معبر كرم ابوسالم ..وهما مع فكرة الزحف فى الوقت الحالى نحو وفلسطين .
مينا دانيال (23 سنة ) قال انه نازل عشان الوحدةالوطنية .. و ان احنا عايزين الوحدة الوطنية دى فى الشارع مش على المناصات بس .. و رأيه فى الانتفاضة الثالثة ..قال ان مصر بتتحرق !! ..لازم نستمد قوة مصر الاول و بعدين نروح نقابل الاعداء .. و مينا مش تابع لاى حزب سياسى .
سعيد سعد(22 سنة) صلى الفجر فى التحرير و راح عشان يدعم الانتفاضة و يأكد الوحدة الوطنية ... و هينزل تانى يوم الاحد (15 مايو) .. وقال انه مع الزحف نحو فلسطين فى الوقت الحالى.. و سعيد مش تابع لاى حزب سياسى.
منار عبدالمعبود(20 سنة ) جاية التحرير فى الاساس عشان الانتفاضة الثالثة و هتنزل التحرير يوم الاحد ..منار مع الزحف فى الوقت الحالى فى اتجاه فلسطين و مش تابعة لاى حزب سياسى .
هند (19 سنة ) نازلة عشان الانتفاضة و هتنزل يوم السبت و الاحد .. ومش مع الزحف لفلسطين فى الوقت الحالى .
فريدة رفاعى (23 سنة ) ..نازلة فى الاساس عشان الوحدة الوطنية .. وبرضه عايزة توصل لاسرائيل رسالة .. و هتنزل يوم الاحد(15 مايو) ..و رأيها بالنسبة للزحف فى اتجاه فلسطين ..ان احنا مينفعش نجرى فى سباق و احنا بنعرج !!
استاذ محمد محمود (54سنة ) نزل التحرير هوا والعائلة عشان الانتفاضة الثالثة و هيروح قدام سفارة اسرئيل ..لكن هو مش مع الزحف فى الوقت الحالى فى اتجاه فلسطين .
كمان كان فيه مجموعة من الشباب .. فى الاساس نازلين مش عشان الانتفاضة و لا عشان الوحدة .. نازلين عشان تطوير التعليم و ده من خلال" مشروع بلدنا " (مؤسسة الحياة الافضل للتنمية الشاملة بالمنيا ) .. وهما مش مع الزحف فى اتجاه فلسطين على الاقل فى الوقت الحالى .. و مش تابعين لأى حزب سياسى .
طبعا فيه تفاوت فى الاراء فى موضوع الزحف نحو فلسطين فى الوقت الحالى .. و لكن الشعب كله على رأى و احد .. وهوا قتل الفتنة الطائفية و دفنها .
شمس بكرة فى قلب الميدان ..جمعة الوحدة و الانتفاضة %25D8%25A7%25D9%2584%25D8%25B9%25D9%2586%25D9%2588%25D8%25A7%25D9%2586%2B%25D8%25A7%25D9%2584%25D8%25AC%25D8%25AF%25D9%258A%25D8%25AF