قصيدة " اللي كان "

من طرف **yousseffayid** الخميس مايو 19, 2011 4:06 pm

للشاعرة / كوثر مصطفي
إهداء إلى أحد رجال ثلاثاء الغضب

اللى كان ... واقف زمان

على باب حياته بيترعش
وبيتضرب ... وبيتعفق وبيتخنق ... وبيتكرش
وكل مادا ... يخاف زيادة
وجوة نفسة ينكمش
اللى كان ...
اللى كان ... ماعادشى هوه
شيل الحمول ... اداله قوة
والدوس عليه ... علمه
ما حد يقدر يكسره ولا حاجه تقدر تهزمه
اللى كان

اول امبارح قابلني
فى المظاهرة جنب منى
وكأنه عمره فى يوم ما مات
ولا اتهزم ... ولا انكسر ... ولا قطره فات
ولا اجبروه يحفر بايده قبر ليه
ويخش يرقد من سكات
اللى كان
اول امبارح قابلنى فى المظاهرة جنب مني
عدا الحواجز والحدود كسر السلاسل والقيود
نظراته طلقات البارود والدم سارح م البيبان
اللى كان ...
اللى كان ماعدش هوه
شيل الحمول اداله قوة
والثورة عمت البلاد
اللى كان ... دا اللى كان