أهلاً بيك

من طرف فوكس الأربعاء يونيو 23, 2010 7:06 am

أهلاً بيك فى بلاد النيل أهلاً بيك مرحب يا جميل
بلد الحضن يساع الكل بلد الدفا والخير والضل
ولما تزورنا فى يوم وتطل تلقى كرمنا مالهش مثيل
تلقى قلوب بالحب تقابلك تشعر إن الكل حبايبك
وإن بلدنا الغالية دى بلدك وإن الحب بدون تمثيل
فاتحة لكل جيرانها الباب كل الناس عندها أحباب
مصر الغالية أم الدنيا بلد المصحف والإنجيل
مصر فى وقت الشدة جسارة مصر فى وقت السلم شطارة
مصر بلدنا تاريخ وحضارة وأنا هاضرب لك ألف دليل
عمر الجرح ما أثر فينا ولا فيش حد إدانا نسينا
والمشاريع من توشكى لسينا وخيرنا بينفع جيل ورا جيل
قبل ما تيجى بفرحة نقابلك إحنا زرعنا الخير من أجلك
واسأل ميت دكتور يشهد لك إن هوانا بيشفى عليل
بلد النصر فى ٦ أكتوبر بلد العسكرى فعلاً سوبر
بلد العلما وجايزة نوبل اللى أخدها «نجيب وزويل»
بالإصلاح ماشيين مشوارنا إيد ورا إيد ولا يوم قصرنا
بكره الخير هيعم ديارنا حمّل ياللا بحب وشيل
بلد الحب وبلد الطيبة بلد الناس كلها حبيبة
بلد العلم وبلد الأزهر حتى الفن بتاعنا أصيل
واللى يزورنا يشوف أهرامنا ويلقى فى وسط آثارنا كرمنا
ولا فيش ضيف وياه قصرنا ولا فيش حد فى مصر بخيل
أهلاً بيك فى بلاد النيل
أحمد حسن عمر
عضو رابطة الزجالين وكتاب الأغانى