روح النملة

بسم الله الرحمن الرحيم
----------
السلام عليكم ورحمة الله وبركاته , بعد حواري مع معالي الباشا الظابط ورجوعي من عند معاليه بالسلامه بأقل الخسائر جيت وقعدت أفكر ايه اللي جاي تاني وانا افكر لقيت نملة قطعت حبل تفكيري ورحت متغاظ منها وموتها على طول وبعد ما إديتها استمارة سته خطر لي حوار مع النملة ودخلت في مناقشة وانا محتد ومتكبر عليها ازاي نملة بحجمها تجادل وتناقش واحد بحجمي ايه خلاص مفيش مقامات ممكن نحضر المناقشة دي :
أنا : قاعد في ملكي وبتنعم بخيري وعايش عالاخر فوجئت باللي موجود ورايح جاي قدام مني ولا هامه حاجة ومش عارف هو بتعامل مع مين رحت ناديت هاي أنت بكلمك إنت
النملة : انا يا عم الحاج
انا : ايوة انت بتعمل ايه هنا
النملة : في ارض الله بسعى على رزقي
أنا : انت اتجننت انت مش عارف انت فين وعند مين
النملة : فين يعني في ارض زي أي ارض بس الريحة هنا حلوة شوية
وكمان مفيش دخان ولا ومجاري ولازبالة ايه البلد دي زي البلاد اللي بشوفها في الدش
أنا : بلد يا بني انت في بيتي
النملة : يا راجل هو ده بيت مش منطقة
أنا : لا يا حبيبي ده بيت
النملة : طب مفيش شوية عطايا للغلابة يا كبير
أنا : عطايا انت مش حاسس باللي احنا ولا ايه , احنا بنمر بمرحلة صعبة , الحمد لله احنا ماسكين نفسنا لحد دلوقتي ربنا يسترها معانا في بكرة
النملة : يا كبير أزمة ايه ما انت عايش في النعيم وحلاوته اهه
أنا : يا حبيبي اللي احنا فيه ده علشان راحتنا من راحتكوا ونعرف نظبطكوا ونعيشكوا عيشة تليق بيكم وده كله "من أجلك انت" وانا مصر إصرار رهيب على تنفيذ تلك الرغبة حتى اخر نفس في حياتي –ياموتكوا ياتموتوني- لمستقبل جميل ومشرق ....
النملة : -تقاطع كلام الكبير- حاسب يا كبير انا بدور على اكل دلوقتي ايه الكلام ده كله سيبني اكل واتغذى واجاي اتعلم على ايدك الكلام الحلو ده اللي مش فاهم ولا شايف منه حاجة , بقولك يا كبير انت مش شعارك من أجلك انت طب ولو اجلي ده ليه عندك خاطر دبر شوية اكل ليا وللعيال
أنا : ايه ده انت نسيت نفسك ولا ايه انت عارف انت بتكلم مين
النملة : هو انا كل ما اكلم حد في البلد دي يقوللي انت عارف بتكلم مين سيادتك يا سيدي
انا : خد اقرا كده وانت تعرف انا مين
النملة : وريني –وبعد فترة تسمر فيها – يا خبر كله كلر –الوان يعني- كبير وظيفته كبير اه كبير يا لهوي يا امه
انا : ايه عقلت ولا ايه
النملة : لا يا باشا خلي بالك انا من عيلة كبيرة قوي في البلد من عيلة النمل الابيض ابو اربع شنبة
انا : قيد عائلي جديد يفيد بانك لاقيط
النملة : وايه يعني الناس عارفاني على ايه قمة في الاخلاق
انا : قضية آداب على واحدة مخلة بالشرف ونخلص منك
النملة : خلي بالك يا كبير انا حتة تقيلة في البلد ناس كتير بتحبني يعني شعبية
انا : حتة قضية عمالة مع الخارج ضد الوطن ومعاها تهمة خيانة الوطن والشعب واللاذي منه
النملة : يعني ايه مفيش فايدة
انا : اه مفيش فايدة حتى اخر نفس في حياتي
النملة : يادي اخر نفس اللي مش عايز يجي لحد دلوقتي
انا : قدرك اصبر على بلوتك
النملة : اصبر ؟! طب كفاية حرااام كفاية حرااام كفاية حرااام
وبعد ما عمل دوشة وخنقنا من كتر المناقشة وجمع النمل حوليه قررنا نحن الموقع أدناه والمحرر للموضوع :
أولاً : دهسه بسرعة مع التخلص منه وتحطيمه وجعله عبرة لمن يخلفه من النمل اللي عايز يعمل راجل وده تطبيقاً للمبدأ اللي حاصل ان البلد معدش فيها رجاله قصدي نمل من حرب 73
ثانياً : اللي يخش بيت الكبار تاني ولو بالغلط هنطلع تيييييييت ونعمل له تيييييت ونركب له تييييييييت
عارفين اللي هيقرب من بيت الكبير تاني من النمل ولا حتى يطلع على قناة النمل الفضائية ومن غير حلفان ديته بودرة فليت من ام 2.5 جنية ونخلص البلد من شروره يا وحشين
وكمان علشان تعرفوا ان روح النملة عندنا لا تساوي شئ ماشي
وحسبي الله ونعم الوكيل ,,,,

ههههههههههههههههههههههههههههههههههه
والله مش عارف اقولك ايه انت طلعت كارثة و انا مش عارف مشكلتك انك جواك ثورى عظيم بس مش قادر او مش عايز تطلع اللى جواك طبعا النملة هى الشعب و انت .................. و لا بلاش عشان مش نتسجن انا و انت و من اجلك انت طبعا ده الحزب العظيم اللى احنا عارفينه بجد انت كاتب قصص معبرة و لست كاتب مقالات فما تتكتبه يندرج تحت بند القصة القصية المعبرة و تعتمد على الايحاءات و الاسقاطات التى اظن ان الجاهل يفهمها بس تقول لمين يا هيثم بيه اكتب زى ما انت عايز عندنا فيه حرية بس قابلنى لو حد عبرك او سألك فيك و طبعا الكلام ده ينطبق عليا انا كمان احسن حد يفتكرنى بقلل من شأنك احلى حاجة فى بلدك " اكتب يا شعب و اصرخ " لكن شوف مين هيعبرك
اسفوخس عليك يا نمل يا وحش ياللى مزعل كبيرنا
بجد يا استاذ هيثم قصتك ديه فى ظاهرها الكوميديا لكن والله فى باطنها الحزن و الاسى
على فكرة انا مش بتكلم كلام انشاء ده فعلا اللى مقتنع بيه و يا ريت لو تنفذ نصيحتى و تبعت الموضوعات ديه للمكان اللى قولت لك عليه لانك خسارة بجد مش تهريج او نفاق ليك انا اول واحد هنقدك
و لك تحياتى و تقديرى ايها المواطن المصرى البسيط

مفيش احلى من البساطة احمد بيك دي اللي بتخليني اتنفس كويس ومشكور كلامك على موضوعي الل بعتبره مهم من شخص خبرة زيك

هيثم جمال كتب:مفيش احلى من البساطة احمد بيك دي اللي بتخليني اتنفس كويس ومشكور كلامك على موضوعي الل بعتبره مهم من شخص خبرة زيك

يا باشا الله يخليك لا خبرة و لا حاجة انا عارف انى عندى اخطاء فى الكتابة لانى لست دارس و لكن انا بحاول بس اعبر عن افكارى مش اكتر بس بقولك اوعى لما تبقى كاتب كبير و صورتك تنزل فى الصحف تعمل نفسك مش عارفنى انا حبيبك برضه صحيح انا مش معاكوا دلوقتى و بقيت بعيد عن الصفوة بس برضه انا ابو اسماعيل ابنك الصغنن

متشكر معاليك على الدفعه دي وهحاول ان اكون نشيط
وشكراً لميرميد على مرورها وده من بعض ما عندكم

افكارك كتير رائعة

ان شاء الله اكون عند حسن ظنكم بي دائماً وفي كمان أفكار كتيرة يا ريت تعجبكم ومتشكر ليكم تحفيزي على تقديم المزيد بس رئيس المنتدى يسبني في حالي ومش يقول لا على مواضيعي لإني بشوره دايماً

موضوع جميل ومعبر جدا ودى موهبة جديدة بنكتشفها فى الاستاذ هيثم ............................ونحن فى انتظار المزيد

جامد جداً شكراً

[img][/img]

حبيبي واحشني يا عبده فينك
بجد مش نفاق الوقت الحالي اللي احنا فيه بتكلم براحتنا مش زي زمان من غير قلق وفي حدود طبعاً بس في شوية حرية بنقدر نعبر بيها بإحترام علشان نقول احنا في وجود ديمقراطية كاملة نقدر نتعايش معاها مش نكون همج