*ملف , مواصفات , الارتباط , الحـياة* , شريك , كامل

من طرف Strange السبت أكتوبر 16, 2010 3:59 pm

*ملف , مواصفات , الارتباط , الحـياة* , شريك , كامل

السلام عليكم و رحمة الله و بركاتة
اهلاً بيكم في موضوع اعتقد انه بيهم كتير مننا ،
و طبعا كلنا فكرنا فية و شغل وقت كتير من تفكيرنا
الموضوع هو عن
مواصفات فتاة و فارس الاحلام
نبدأ علي بركة الله

أولاً: تحديد المواصفات

طبعاً مواصفات شريك الحياة بتختلف من شخص لأخر ، و من بيئة لأخري
و ده بيكون راجع لعدة عوامل منها اساس تربية الشخص نفسة ،و طريقة تفكيرة
و قدرة علي تحمل المسؤلية و هدفة من الارتباط.

كل واحد مننا بيكون عايز يرتبط لأنة من المفروض انه بيدور علي الاستقرار و السكينة اللي موجودة في الزواج
لكن هل في حد فينا فكر لية ربنا خلي في ارتباط و خلي في اسرة و قدس الاسرة؟؟؟؟
في قولة تعالي:
(و جعلنا بينكم ميثاقاً غليظاً) صدق الله العظيم
ميثاق غليظ هنا بسبب اهمية دور الاسرة في تعمير الارض اللي هو سبب وجود الإنسان
الإنسان اللي هو خليفة ربنا علي الارض (إني جاعلاً في الارض خليفة) صدق الله العظيم
و ده بيبين قوة الاسرة و اهميتها ، و اهمية بناء اسرة تكون صالحة لتنفيذ اوامر ربنا
و تكون قادرة علي تأدية الدور المطلوب منها.
و هنا نيجي لنقطة المواصفات و يكون في سؤال:
هل كل الاشخاص مؤهلين انهم يقوموا بالدور ده؟؟؟؟
هل كل الاشخاص عندهم الاستعداد انهم يكونوا اسرة تكون مثل للاسرة المسلمة الصالحة؟؟؟
هل بيكون عندهم الاستعداد انهم يبنوا اسرة تكون مثل للاسرة المسلمة الملتزمة ،
و في نفس الوقت ماتكونش متزمتة او متطرفة و تكون منفتحة علي العالم بطريقة سليمة ماتغضبش ربنا ؟؟؟

طيب اية المواصفات اللي المفروض انها تكون موجودة في شريك الحياة؟؟؟
طبعاً كلنا متفقين ان مفيش حد كامل ،و عشان كدا لازم يكون في حد ادني او شروط تكون موجودة عشان نقدر نبني اسرة صالحة،

الشروط الواجب توافرها في شريك الحياة (فارس الاحلام):

اولاً التدين ،بمعني انه يكون بيصلي و مصلي هنا يعني محافظ علي صلاة
مش يوم و يوم و يكون فاهم اهمية الصلاة و فاهم اوامر ربنا كويس و يكون بيتقي الله في كل او معظم تعاملاتة اليومية
تاني حاجة يكون متحمل للمسؤلية بمعني انه يكون راجل ، راجل بمعني الرجولة مش المعني الذكوري
يكون قادر انه يصون زوجتة و يحافظ عليها و يحبها ،
و طبعاً يكون بار لأهلة لأن اللي مالوش خير في اهلة مالوش خير في حد
و هنا نقطة خطيرة اوي محدش يقدر يضحي باهلة عشان بنت بيحبها لأن وقتها هايجي علية يوم
و هايبيعها بالرخيص اوي لأنة ببساطة مش بيصون اي حد ولا فارق معاه حد غير نفسة

طيب و الشروط الواجب توافرها في شريكة الحياة (فتاه الاحلام)

قال رسول الله صلي الله علية و سلم
( تنْكحُ الْمَرْأَةُ لأرْبَع: لمالها ولِحَسَبها ولِجَمَالها وَلدينها: فَاظْفَرْ بذاتِ الدِّينِ تَرِبَتْ يَدَاك)

و تربت يداك هنا بمعني ن الرجل اللي بياستغني عن الدين او تدين الزوجة
فكأنة مرمغ ايدة في التراب يعني ماكسبش اي حاجة خااااص بالعكس ده هايكون خسر كتيير اوي اوي
طيب!!!! معني كدا اننا ندور علي الدين و خلاص و مش مهم اي حاجة تاني؟؟؟؟
هنا الاجابة هاتكون "ايوة" صح كدا و السبب بسيط جداً
لأن اي صفة هاتكون عايزها في زوجتك بالتأكيد هتلاقيها في المرأة المتدينة اللي فاهمة دينها بطريقة صحيحة
اما عن المال فالمفروض ان القوامة للرجل فمايصحش ابداً انك ترتبط بواحدة عشان تصرف عليك
و بالنسبة للحسب فدة بيكون علي حسب البيئة اللي انت متربي فيهاو برضة علي اساس القوامة
المفروض انه صعب علي اي راجل انه يرتبط بواحدة تكون افضل منه في المستوي الاجتماعي
لأنها بتكون زي السكينة اللي في ضهر الزوج اللي مع الوقت بيكون مش قادر يتعايش معاها
اما عن الجمال فأنا مش هاقول ان الجمال نسبي او بيروح مع السن او كل الكلام ده
بس اللي هاقول هو عدم المغالاة في مواصفات الجمال لأن اكيد مش كل الرجالة هايتجوزوا ملكات الجمال.

تاني حاجة في اختيار شريك الحياة اللي من الواجب مراعاتها هي

التكافؤ الاجتماعي

و التكافؤ الاجتماعي هنا بيندرج تحتية عدة عوامل و هي
تكافؤ ديني و ثقافي و اجتماعي و مادي

لأن كل واحدة من العوامل دي كفيلة علي انها تبني او تهد الاسرة
لأنهم ببساطة الاربع عواميد الرئيسية في اي علاقة بين زوج و زوجتة
فلابد من التكافؤ في العوامل دي ، و طبعاً مش بنقول يكون في تطابق
قد ما يكون في شبة مساواة او يكون في حاجة بتعوض حاجة
يعني ولا الزوج يكون افضل في كل شيء ولا الزوجة تكون افضل في كل شيء
لأن ده بيسبب حساسيات بين الزوجين و ايضاً بين العائلات
لأننا لازم نفهم ان الجواز مش ارتباط اتنين ببعض لالالا
الجواز هو زواج عيلتين بالكامل و عشان كدا لازم ناخد بالنا اوي من العوال دي
عشان مايحصل اي مشاكل او مضايقات احنا في غني عنها

تالت و اخر حاجة هانتكلم عنها هي قبول الاهل بالاختيار

و هنا نقطة مهمة جدا لأنها سبب مشاكل كتير و سبب خلافات كتير
و هنا اعتقد ان العند او الرغبة في التحكم بيكونوا موجودين عند الشاب او البنت و كمان عند الاهل
فالشباب بيكونوا مصممين علي اختيارهم لأنهم بيحبوا و شايفين انهم صح 100%
و كمان الاهل بنظرية احنا الكبار فنعرف اكتر منك بيكونوا مصممين علي رأيهم و لأن بأيديهم السلطة علي ولادهم
فالمفروض هما يكونوا اذكي او اكثر قدرة علي الاقناع لأن في حالات الاختلاف في الرأي علي اختيار شريك الحياة
بين اي من الطرفين طرف و اهلة ، بيكون الطرف الاذكي فيهم و الاهدي و الواثق من اختييارة هو الصح
و هو اللي بيقدر يقنع اللي حوالية برأية مهما كانوا مصممين علي رأيهم
طيب ازاي اقنع اهلي برأي في الاختيار؟؟؟؟؟؟
اول حاجة لازم تكون او تكوني مؤهلين للاختيار ،بمعني انكم تكونوا اصلاً اصحاب قراركم
و مايكونش في حد متحكم فيكم و تكونوا ثابتين لكل الناس اللي حواليكم انكم تقدروا تتحملوا المسؤلية
و ان قرارتكم المصيرية اللي اخدتوها في حياتكم قبل كدا كانت صح.
تاني حاجة جربوا طريقة تبادل الادوار يعني حضرتك تحط نفسك في مكان والدك و والدتك و هما يحطوا نفسهم في مكانك
و كل واحد يقول لنفسة وجهة نظر الطرف التاني زي ما الطرف التاني شايفها و هنا النظرية الاقوي هي اللي هاتغلب

أخر حاجة و دي بقي نصايح واجب العمل بيها وقت النقاش مع الاهل

1- انك تعرفهم انهم اغلي و اهم ناس في حياتك ، و انك مش هاتقدم علي اي خطوة من غير رضاهم
2- مفيش داعي ابداً للعند لأن العند بيولد العند و في الاخر انت اللي هاتخسر حبك لو ماحصلش نصيب
3- الخصام او الجفاف في فترات النقاش برضة بيولد مشاعر ضد الطرف اللي انت عايز ترتبط بي فمفيش داعي من الخصام ابداً
4- حاول و انت بتقنعهم تبين قد اية انت محتاج للانسنة دي انها تكون في حياتك و تبين حبك ليها و قد اية هي غيرت فيك حاجات للاحسن
لأن في الاخر خالص الاهل بيكون هاممهم مصلحتك و سعادتك و لو وثقوا ان سعادتك معاها عمرهم ما هايعترضوا
5-افتكر دايما و انت بتتناقش انكم بدوروا علي مصلحتك في حياتك و ان اهلك دول مش خصوم ليك
لا ، دول بيفكرو في مصلحتك زيك زايهم بالظبط.

من طرف الموسيقار الأحد أكتوبر 17, 2010 12:19 am

بصراحة أنا شايف أن الموضوع في الأول وفي الأخر هو توفيق من عند ربنا أهم حاجه أن الانسان يكون متوكل على الله ونيته سليمة وستخير ربنا وفي النهاية ربنا يهيئ الخير للجميع .

من طرف Strange الأحد أكتوبر 17, 2010 1:13 pm

طبعا كل شئ بايد ربنا عز وجل وانا ذكرت كدا فى الموضوع لكن دة ميمنعش ان كل حد ليه مواصفته

ملف , مواصفات , الارتباط , الحـياة , شريك , كامل