أحلام مرشح

من طرف فوكس الأحد أكتوبر 17, 2010 10:50 pm

آه لو البلية تدور وانجح كده ويبقى لى دور

وأنسعد واخد الحصانة تتعدل كل الأمور

وأبقى نايب يا سلام والبس الحتة التمام

وأركب القطر المكيف وأبقى أسطى فى الكلام

وابنى فيلا من دورين حلم عمرى من سنين

وأشترى جرار زراعى وامتلك وابور طحين

وابنى فرن كبير وآلى لجل مستقبل عيالى

يصرفوا له دقيق مدعم نضحكوا بيه ع الأهالى

وابقى واحد م الذوات فى البنوك ليا حسابات

ليا فى السوق اسم هايل عندى كام دفتر شيكات

وابقى فى المجلس خطير أسئلة وطلبات كتير

والجميع يعمل حسابى الصغير والكبير

وابقى راجل م الكبار ليا سمعة واسم نار

صورى تنزل فى الجرايد جنب صناع القرار

وابقى واسطة للقرايب واللى يدفع م الحبايب

والمصالح لما تمشى يبقى لى فى الحب نايب

يومها راح يصفى الزمان وألقى نفسى فى الأمان

وبشطارتى والحصانة تنفتح كل البيبان

واشتغل فى حاجات كتيرة وامشى فى صفقات كبيرة

سمسرة وعمولات وغيره لجل ما أعمل الخميرة

واجمع الثروة بهمة مهما كانت صعبة المهمة

وامشى فى المشوار لآخره أصلى راجل عندى ذمة

آه لو البلية تدور وانجح كدا ويبقالى دور

وانسعد واخد الحصانة تتعدل كل الأمور

من طرف هيثم جمال الإثنين أكتوبر 18, 2010 10:48 pm

يبقى توهت في دنياك يا مسكين وضاعت منك الأخرة
وبالسلامة على كدة

أحلام مرشح

أحلام مرشح

رد: أحلام مرشح