الرحيل ..............

مهداه الي روح الراحل العزيز
ــــــــــــــــــــــــــــــــــــــــــ

فايت ربيع العمر ومسافر
فايت غناوي الحب للعشاق
فايت صحاب الدرب بتعافر
وتشد ف حبال الفراق
فايت حبايبي والدموع ع الخد
زي المطر ع الساحل
لكن خلاص ........
شايل همومي وراحل

ما تسألوش : علي فين؟
وماتقولوش خاين
عمر اللي داق الحب مابيخون
عمر اللي داس ع الصعب ما بيكون
الا انتفاض الزمن وقت السكون
الا عتراض الحق ع الباطل
الا الضيا ف العتمة لما تلف الكون


الدمع افيون الحزانة
وانتي صبية باختلاف كل البنات
انتي صبية مخلوقة م زهر النبات
علميهم ياحبيبتي ........ يعني ايه كلمة ثبات


فهمي الاطفال حبايبي ........ هي ايه اصل الحكاية
كلميهم عن شقايا ... ف الطفولة
اسحبي الضي اللي باقي من عنيا
فرغيه ف الكبايات
فرقيه ويا الفطار
يشربوا طيف الحقيقة
يتولد فيهم نهار

والبنات لو يسألوكي : هو عنده كام سنة ؟
قولي اكبر م السنين ........قولي اكتر م الحساب
عاش يومين ....... دهرين اماني
بس قالي لما اموت .............. كفنيني بالسحاب
وازرعيني ف البيوت
ضحكتين لاجل الولاد
مرغيني ف الحقيقة ........ وزعيني ع الصحاب
يلمسوني...... يعرفوني ...... يحفظوني ف الكتاب

اياكي من ضعف البنات
اياكي م البكا .... ومن السكات
اياكي من طول انتظاري
اصلي خلاص ماشي
ويا نسيم الصبح
ويا انكسارالشعاع
زي انسلاخ الجلد .... من فوق جسد ناحل
اصلي خلاص راحل .