عايزين نطلع الدور التاني

[center]



السلام عليكم وبعد
النهاردة طبعاً اول يوم حرية بجد بتاعتنا احنا الشعب مش بتاعتهم الحمد لله احنا عايشين في بلدنا بقى لينا صوت حقيقي الناس شعرت انها عايشة في ملكها فعلاً ومش خايفة من المالك لأحسن يجي ويقولهم الجديد عندنا ايه النهاردة في مينوه المعاناة اليومية النهاردة الظلم رحل عننا وبقى الزعيم شخص عادي زيه زينا تصوروا يعني مش نصف اله او نبي زي ما كنا متخيلين التاريخ تدخل بقدرة الله عز وجل .
رحل مبارك مش هنقول طاغية ولا ظالم ولا اي حاجة وحشة ولا هنقول انه كان مطلع ...... امنا لالالالالالالا ده كان عسل ومية مية اهم حاجة مشي غيرناه خلعناه نطرناه اي حاجة اهم حاجة مشي يعني مش هشوفة تاني مش اسمع بلاويه القديمة مش عايز اشوف مذكرات الحاشية اللي حواليه عنه مش عايزه تاني كفاية كده .
30 سنة واحنا عايشين في الدور الأرضي مش شايفين ايه اللي بيحصل فوق في الدور التاني قاعدين مكانا محلك سر مش عارفين عايشين ليه اه قاعدين نتعلف ونام والكبير محسسنا ان دي نعمة علينا لازم نحمد ربنا عليها واوعوا تعملوا حاجة وحشة في الدور الارضي ده مكانكوا لازم تحافظوا عليه واوعوا تكلموا جيرانكم يعني مش كلهم اللي يقولنا عليه بس والضيوف تيجي تزورنا وتبص لينا بقرف كده على اننا شوية متخلفين معفنين يعني ولما يسئلوه علينا يقولهم دول لسة بدري عليهم لما يطلعوا يعيشزا في الدور التاني وبعدين واحد يقولي ايه الدور التاني والدور الاول ده
اقولك الدور الاول ده عبارة حصيرة على الارض ومية متخلطة بشوية مجاري منه فيه على شوية فيروسات وميكروبات من اللي قلبك يحبها على شوية لجان خنقانا على شوية اكل مسرطن والهوا ايه كله متخلط بجميع انواع الملوثات علشان التجديد يعني يبقى مش هوا بس على تعليم مش محصل الكتاب -بتشديد التاء- ده غير المنعشات اللي كيفتنا طول حياتنا ده غير رفيقنا فرج اه ده بقى زي ظلنا واللي يحاول بس يشتكى او يحلم انه يشتكي فرج بيتعامل معاه
لكن تقول ايه لاخوتنا المفتحين وقلبهم مات من الاكل والشرب والعيشة ومن فرج كمان وعايزين يطلعوا الدور التاني نظموا يوم قالوا ان الدور التاني ده سمعوا انه جنة عايزين يعيشوا فيه ما الدور التاني زي الاول ملكهم الكبير قالهم مفيش مشاكل ان عندي حرية تعبير خدوها والعبوا بعيد ومش تعملوا وجع دماغ ليا
الرجالة بتوع الدور الاول نظموا يوم وقالوا هو ده اليوم طبعاً الكبير كان مكلم فرج علشان يعمل اللذي منه وطلعوا الشباب وطلع فرج والكبير بيتفرج وعارف ان فرج هيعمل الواجب هه الواجب والشباب استغرب هي دي حرية التعبير



وكملوا في طريقهم عادي جداً وقبلوا كل المشاكل اللي عملها ليهم فرج بس في مفاجأة اتصدقوا خبر مدهش فظيع جداً فرج طلع مبيعرفش اه والله مبيعرفش والصراحة راحة يا عم لقى كل حاجة نازلة عليه زي الصواريخ جري زي الخروف اصله مبيعرفش والكبير اتخض حاول يعمل اي حاجة علشان يطلع من اللي هو فيه لكن خلاص الشباب مصرين على انهم يطلعوا الدور التاني وقبل ما هما يطلعوا يكون الكبير سابها ليهم علشان لو شافوه فوق هيطبقوا عليه حكم السكاناكا حتى الموت ويتمتعوا بالنعيم ده اللي فوق ويعيشوا زي الناس العادية ويعملوا الجديد اللي هما بيحلموا بيه ومسمعوش كلام الناس اللي بتحبط فيهم اللي بيقوللهم هتعيشوا ازاي بعد الكبير هتخرب عليكوا , هتخرب مين يا عم ده احنا خلعناه يا عم الحاج وفعلاً الكبير قلب من الدور التاني والناس مستنيه يطلعوا الدور التاني بس عايزين شوية في الديكور قبل ما يطلعوا علشان مش عاجبهم الشغل القديم وهما مستنيين قاعدوا يقولوا :

[center]

وبكرة في جديد ان شاء الله مبروك لمصر , تحيا مصر , المجد لمصر

الحمد لله فعلالكل ظالم نهايه
وبكره انشاءالله هيكون اجمل بكتير من النهارده
ورحم الله شهداء مصر وادخلهم فسيح جناته
موضوعك جميل جدا
جزاك الله خيرا

يارب تكمل فرحتنا على خير
وبكره ان شاء الله احسن من انهارده
حتى لا يشمت الكلاب فينا
يارب تبقى مصر من اغنى الدول وياريت كل مسؤل يخلى عنده ضمير
وكفايه رشاوى وشخشخ جيبك وشوف نفسك والعبارات اللى خنقتنا طول السنين اللى فاتت