ثورة!!!!!!!!!! يعنى ايه ثورة..؟!

أحنا صحيح قومنا بثورة...قومنا بثورة و اسقطنا نظام و غيرناه كمان..
احنا كنا تعبانين من اللى حاصلنا و الحكم اللى كان محكوم علينا بالذل و الهوان و الفقر و الجوع و القهر..كل دا احنا كنا عايشين فيه و مكانش عاجبنا ..و كنا بنشتكى.. بس بتيجى لحظات كدة تتكتب فى التاريخ بتعلن و بتوجب التغيير.. التغيير فى كل حاجة فى السياسة اللى بنتحكم بيها و تغيير اقتصادى و اجتماعى و كل حاجة و دا بيحصل بس عن طريق الثورة...
ثورة يعنى ايه ثورة؟!

الثورة ببساطة عمل ايجابي ..تغيير جذرى ..تغيير اى وضع فاسد و غير صالح لوضع احسن..
دا التعريف اللى اتعرف على مستوى جميع الثورات اللى قامت على مدار التاريخ و الثورة دى بتكون يا اما ثورة شعبية بيقوم بيها الشعب كله او انقلاب عسكرى بيقوم بيه العسكر و ينضم اليه الشعب او حركة مقاومة ضد احتلال .
الثورة في اللغة تعني الهيجان والوثوب اما المصطلح اللاتيني Revolution المقابل للكلمة ثورة باللغة العربية فهو تعبير فلكي شاع استخدامه بعد ما اطلقه العالم كوبر تيكوس 1473-1543 على الحركة الدائرة المنتظمة للنجوم حول الشمس .
ثورة.. تمرد ...العصيان ...كل دى مصطلحات بتدل على التغيير المفاجىء و اعادة بناء المجتمع بشكل جديد .
اما الانقلاب: هو ان السلطة الحاكمة بتحدث تغيير و لكن بطريقة غير شرعية ، مثلا رئيس الجهورية يعين نفسه ملك او يعين ابنه و يحولها لملكية من غير ما ياخد رأى الشعب او ان الجيش يقوم او بعض وحداته بالاطاحة بالحكومة القائمة والاستيلاء على السلطة . والانقلاب هدفه الوحيد انه يستولى على السلطة لنفسه من غير ما يحدث اى تغيير اجتماعى ا و اقتصادى او قانونى .. اما الثورة فهدفها احداث تغيير جذري في النظم والاوضاع.
امراً حتمياً. ان لكل شعب ثورتان ثورة سياسية يسترد بها حقه في حكم نفسه بنفسه من يد طاغية فرض عليه او من جيش عايش فى ارضه دون رضاه. وثورة اجتماعية تتصارع فيها طبقاته ثم يستقر الامر فيها على ما يحقق العدالة لأبناء الوطن الواحد.
اشهر الثورات فى التاريخ المعاصر:-
الثورة الفرنسية : بدأت احداثها فى عام 1789 واستمرت عشر سنين ، وتنوعت اسبابها مابين الإجتماعية ان الملوك و الامراء و رجال الدين كانول بيحتكروا الحكم ليهم و ظالمين بقيه طبقات الشعب و بيفرضوا عليهم ضرايب كبيرة جدا و انتشرت فى الوقت دا المجاعات و البطالة و الظلم و دا كان ادعى بقيام الثورة دى اللى اتجمع فيها كل طبقات الشعب من مفكرين و فلاحين و عمال و قساوسة صغار و كانت من نتائجها انشاء الدولة الحديثة و التخلص من الحكم الملكى و وضع دستور يتيح الحريات و يحقق الحد الادنى من العدالة الاجتماعية.
الثورة البلشفية : أو ثورة اكتوبر الحمراء ودى هى المرحلة الثانية من الثورة الروسية سنة 1917 و اللى كانت أهدافها المساواة بين فئات الشعب والقضاء على الإقطاع وانها تحقق الاشتراكية . الثوره دى قامت بقياده ڤلاديمير لينين و ليون تروتسكى مبنيه على افكار كارل ماركس عشان يعملوا دوله شيوعيه اللى بقت الاتحاد السوڤييتى, ( مبدأ هدفه إقامة مجتمع تسوده المساواة بين كل المواطنين، ويتحقق فيه الأمن الاقتصادي للجميع و علشان يحصل كدة لازم الحكومة اللى بتمثل طبقات الشعب العاملة تملك كل المصانع و الألات مش الافراد) .. الثوره البلشفيه بتعتبر اول ثوره شيوعيه تنجح انها تحقق اهدفها و تبنى اول دوله شيوعيه فى التاريخ.
ثورة 1919 : كان من اهم اسبابها معاملة المحتل البريطاني تجاه المصريين ونفي سعد زغلول وهى اول ثورة مصرية يشارك بها النساء بقيادة صفية زغلول اللى طالبوا فيها بالافراج عن سعد زغلول و اللى اضطرت إنجلترا بسبب اشتعال الثورة إعطاء مصر بعض حقوقها زى الغاء الحماية البريطانية عن مصر وصدور أول دستور مصري سنة 1923 و تشكيل أول وزارة برئاسة سعد زغلول 1924 (الذي افرج عن المسجونين السياسين)
ثورة العشرين : ثورة عراقية قامت سنة 1920 واتخذت الثورة باديء الامر شكل العصيان المدني ثم دارت بعد كدة بعض المواجهات المسلحة و دا لمقاومة النفوذ البريطاني بسبب سوء معاملة الانجليز للعراقيين و اللى اشعل شرارتها القبض على احد شيوخ العشائر ( الشيخ ضاري بن محمود ) .
ثورة 23 يوليو : هي انقلاب مسلح عام 1952 من حركة الضباط الاحرار فى الجيش بقيادة جمال عبد الناصر اللى اجبروا فيه الملك فاروق على مغادرة البلاد والتنازل عن العرش بسبب الفساد و تدهور احوال مصر فى الفترة دى و اللى بعدها اتحولت مصر لجمهورية و بدأ انتشار التغليم و التخلص من الاقطاع و ظهور الطبقة الوسطى المصرية و تأميم قناة السويس.
الثورة الاسلامية : نشبت عام 1979 فى ايران بسبب الفساد الملكى وحولت ايران من ملكية إلى جمهورية إسلامية بقيادة الامام الخميني وتم عزل شاه ايران محمد رضا بهلوى و التخلص من التبعية الامريكية و العلمانية.
الثورة البرتقالية : اندلعت عبر سلسلة من الاحتجاجات فى اوكرانيا نوفمبر 2004 وحتى يناير 2005 بسبب الفساد الانتخابي اللى حصل فى الإنتخابات الرئاسة الاوكرانية .
ثورة الياسمين : اندلعت احداثها فى 17 ديسمبر 2010 بتونس تضامنا مع الشاب محمد البوعزيزي اللى حرق نفسه مما ادى الى وفاته والى قيام ثورة شعبية اطاحت بالرئيس التونسي زين العابدين بن على اللى هرب بعدها الى السعودية.
ثورة شباب 25 يناير : اندلعت احداثها فى مصر يوم 25 يناير يوم عيد الشرطة ثورة على الفساد و التعذيب و الفقر و البطالة و دا كان عن طريق دعوة وجهت من الشباب على الموقع الالكتروني الفيس بوك للمطالبة بالاصلاح إلا أن تعامل الشرطة فى قمع المتظاهرين ادي الى قتل المئات واصابة الالاف و خلى دا اشتعال الثورة فى كل حته فى مصر..و سقوط نظام مبارك بعد 30 سنة حكم و محاكمته هو اسرته بسبب الفساد و السرقة..
و الثورة لسة مخلصتش لسة مكملة قدامنا كتير اوى علشان نحقق اهدافها ثورة الشعب وحده هو صاحبها و علشان يقدر الشعب دا يحكم نفسه و يتخلص من كل اللى عانى منه طول السنين اللى فاتت دى لازم يجاهد و لازم يعافر و لازم يكمل..و علشان الثورة تبقى ثورة لازم الشعب يحس بتغيير حقيقى و جذرى ..الله مش هى دى الثورة و لا ايه؟! مش المهم اننا اسقطنا نظام المهم ازاى حنبنى نظام غيره....

امين يا رب العالمين

مجهود رائع
ومعلومة اروع

روضة كتب:امين يا رب العالمين

الموسيقار كتب:

روضة كتب:امين يا رب العالمين

؟؟؟

ده رد على
ربنا يحفظ مصر من العابثين