الاطفال والتليفزيون

من طرف angel الخميس ديسمبر 09, 2010 8:28 am

الاطفال والتليفزيون

فى امهات بتبقى فرحانة ان ابنها او بنتها متنحين ادام التليفزيون ليل نهار
فبالتالى بتريح دماغها من دوشتهم وشقاوتهم وتفتحلهم التليفزيون عشان تستغل الوقت اللى هما بيتفرجوا فيه عليه عشان تعرف تعمل اى حاجة فى البيت

وطبعا هى كده بتضرهم ضرر كبير
لان فرجة الطفل على التليفزيون اوقات طويلة بيحرمه من ممارسة نشاطات كتيرة طول اليوم يعنى بيحجم نشاطه
فبالتالى مش هيقدر يكتسب اى خبرة جديدة او معلومة او ان سلوكياته وعاداته وافكاره تنمو بشكل سليم لانه مش بيتعلم فالنضج بتاعه مش هيكون مظبوط

ده غير ان هتبقى خبراته غير واقعية اكتسابها من التليفزيون

كمان ممكن علاقاته الاجتماعية تبقى محدودة او مش متوازنة لانه طول ماهو اعد ادام التليفزيون مش هيبقى فى حوار مع حد
ده بالنسبة للمشاهدة التليفزيون لاوقات طويلة

نيجى بقى لعدم الرقابة على البرامج اللى الطفل بيشوفها واعطاء الطفل مطلق الحرية فى الفرجة على التليفزيون
والعادات الغلط اللى ممكن يكتسبها من التليفزيون وتقليده للتصرفاته والسلوكيات اللى بيشوفها

فلو انتى حددتى للطفل مدة زمنية يتفرج فيها على التليفزيون عشان مايأثرش على نشاطه يبقى لازم تكونى معاه وهو بيتفرج على التليفزيون
تناقشيه فى اللى هو شافه وتسأليه اتعلم اية

ولو شوفتى سلوك غلط او عادة سيئة تعرفى الطفل وتفهميه ان السلوك ده مش صح
ولو شوفتى حاجة كويسة حاولى تخلى الطفل يعملها

وعودى الطفل من صغره انه يختار البرامج اللى هتفيده اللى هيطلع منها بحاجة
مش مجرد عيال اعدين بيتنططوا وحاجات بتجرى ورا بعض وخلاص
بمناقشتك وكلامك وتوجيهك لطفلك هيتعود يختار برنامج يفيده
لانك دايما بتساليه اتعلمت اية من اللى شوفته؟
فهيعرف ان لازم يشوف حاجة مفيدة يتعلم منها

لو سبتى الطفل اوقات طويلة ادام التليفزيون "حتى لو كان بيتفرج على برامج هادفة" فده بيأثر على نشاطاته وخبراته وعلاقته مع غيره

ولو سبتيه ادام التليفزيون فترة قليلة بدون رقابة منك هيأثر على سلوكه
ومارجعش اشتكى ان ابنى بيشتم كتير
او انه عصبى
او عدوانى

يبقى الطفل يتفرج على التليفزيون وقت قليل وبرقابة منى مع مناقشة اللى بيشوفه

وبما اننا فى رمضان يعنى كرنفال المسلسلات والبرامج
واغلب الامهات بتسيب الطفل ادام التليفزيون عشان تعرف تطبخ وتخلص شغل البيت
فانتى ممكن تشغلى طفلك بحاجة تانية غيرالتليفزيون
اولا ماتعوديش طفلك من صغره ان رمضان يعنى تليفزيون ومافيش حاجة بنعملها فى رمضان غير الفرجة على التليفزيون
فهميه من صغره الغرض من رمضان وليه اتفرض علينا

طب هتشغلى وقت طفلك باية؟
لو طفلك بيعرف يقرا خليه يحفظ السور الصغيرة فى القران
هتيله كتاب للاطفال فيه قصص الصحابة
وفى كتاب جميل للشيخ محمود المصرى اسمه قصص عمو محمود
خليه يقراها وتناقشيه فيها
فى كمان كتب بسيطة بتعلم الطفل ازاى يعمل العابه بخامات بسيطة ومتوافرة عندنا فى البيت
ده مفيد جدااااااا للطفل هتخليه يعتمد على نفسه وهيفكر وهيبتكر
ممكن تخليه يساعدك فى البيت عشان يتعود على ده لما يكبر
او يمارس رياضة

لو مش بيعرف يقرأ
ممكن تسميعه فى الكاست السور الصغيرة وخليه يرددها لحد ما يحفظها
ممكن كمان تجبيله بازل او اللعب اللى بتنمى الذكاء
او حتى تسبيه يلعب فى اى حاجة
بس بلاش التليفزيون