رد: البرنس المصرى على كرسى الاعتراف

يا عم همام كفيت و وفيت

من طرف فوكس الإثنين يونيو 14, 2010 6:49 pm

مارايك فى النا ئب احمد عز
بصراحه

من طرف الجبلاوى الإثنين يونيو 14, 2010 10:19 pm

قلنا يا برنس
ايه رايك فى يوسف بطرس غالى و محمود محى الدين و طبعا احمد عز و دول طبعا شلة جمال مبارك
و قلنا ايه رايك فى وزير الاسكان احمد المغربى لما باع 35 كيلو متر مربع من ارض الوطن لشركته
و قلنا ايه رايك فى توريث الحكم لسمو ولى العهد جمال مبارك
و ايه رايك فى حكم العائلات فى مصر زى عائلة اباظة و المغربى و جرانة و الجبلى و الفقى و الجندى و محى الدين و الالفى و البدراوى و ذو الفقار و ثابت والدمرداش و خلى بالك كل دى كانت عائلات باشاوات و شركس و اعداء لثورة يوليو يعنى الحكم الملكى رجع تانى من غير تاج و عرش

من طرف هيثم جمال الإثنين يونيو 14, 2010 11:19 pm

السلام عليكم يا أهل المنتدى
يا أهلا بالبرنس ضحية كرسي الاعتراف
عندي بعض الاسئلة وياريت تكون خفيفة عليك
س1 : الحياة معاك تسوى ايه ؟
س2 : مين اغلى شخصية عندك في حياتك كلها وبتعتبرها قدوة ليك ؟
س3 : انت في الوقت الحالي بيدور داخلك ايه ؟
س4 : انت بتحس انك طيب قوي بدرجة مبالغ فيها بالنسبة للبتشوفه حواليك ؟
س5 : بتتقبل النقد ولا ؟
س6 : مين من اصحابك نفسك متكلموش تاني ؟
س7 : انت رايح على فين ؟

من طرف هيثم جمال الإثنين يونيو 14, 2010 11:22 pm

ولو سمحت الأستاذه العضوة الجديدةبالمنتدى كريستين بالنسبة للسؤال الموجه للبرنس المصري الخاص بانه لو كان رئيس جمهورية .....؟
ممكن انا اوجه السؤال ده ليكي
وبعد ما تتفضلي وتجيبي عليه ممكن تفسري ازاي الأقباط بيتقدموا سياسياً وفي نفس الوقت مش عارفين ينظموا احوالهم الشخصية ؟!!!

من طرف احمد اسماعيل الثلاثاء يونيو 15, 2010 3:47 pm

سلام عليكم
السادة اعضاء المنتدى اعتذر عن عدم اشتراكى معكم طوال الفترة الماضية نظرا لانقطاع خدمة النت لدى و للاسف سأغيب عنكم لفترة من الزمن لا اعلم قدرها بالضبط
و لى طلب واحد من السادة اعضاء المنتدى ارجو و التمس و توسل لكم عدم الحديث عن الاديان و البعد عن كل ما يخص المعتقدات يا جماعة البلد مش ناقصة و ارجو من البرنس المصرى عدم الاجابة عن اى سؤال يخص الاديان سواء الملسمين او المسيحيين نهائيا
فالدين لله و الوطن للجميع و اى سؤال عن الاديان و المعتقدات سأقوم بحذفه بصفة شخصية لاننى لن اسمح بأى فتنة فى ذلك المنتدى فكلنا اخوة و اصدقاء تقابلنا على خير و ان شاء الله لن نفترق ابداً
مع خالص احترامى و تقديرى للجميع

فوكس كتب:مارايك فى النا ئب احمد عز
بصراحه

والله بص انا هاقولك بصراحة انا كل اللى كنت اعرفه عن احمد عز انه محتكر الحديد فى مر وهو اللى متحكم فى السوق بناء على انه نائب فى مجلس الشعب وزى ما قلت انا باكره الانسان اللى بيستغل سلطته وكمان امكانياته وكنت باستغرب ان الحكومة كانت ساكته بالرغم كل الكلام اللى كان بياكتب وينقال وانا كنت باكرهه بس من اللى باسمعه
وبعد ما قريات الموضوع اللى كاتبه فوكس عن احمد عز كرهته اكتر لما عرفت ان له اصل يهودى وكمان اصل امواله مش معروف منين بصراحة اول مرة كنت اسمع المعلومات دى لانى ما عدتش باحب اشغل دماغى بحاجه

الجبلاوى كتب:قلنا يا برنس
ايه رايك فى يوسف بطرس غالى و محمود محى الدين و طبعا احمد عز و دول طبعا شلة جمال مبارك
و قلنا ايه رايك فى وزير الاسكان احمد المغربى لما باع 35 كيلو متر مربع من ارض الوطن لشركته
و قلنا ايه رايك فى توريث الحكم لسمو ولى العهد جمال مبارك
و ايه رايك فى حكم العائلات فى مصر زى عائلة اباظة و المغربى و جرانة و الجبلى و الفقى و الجندى و محى الدين و الالفى و البدراوى و ذو الفقار و ثابت والدمرداش و خلى بالك كل دى كانت عائلات باشاوات و شركس و اعداء لثورة يوليو يعنى الحكم الملكى رجع تانى من غير تاج و عرش

والله بصوا يا جماعة احنا فى زمن مالوش قواعد ثابته كل اللى فى ايده سلطه او يعرف حد فى ايده سلطه ممكن يعمل كل اللى هو عاوزه ويستغل نفوذه
والله انا عموما ضد التوريث لان احنا مش دوله ملكية لكن برضوا انا ما اعرفش ايه اللى ممكن يحصل بعد كده اى رئيس هييجى هيتم اختياره ازاى؟؟؟
يا ترى الحاشية الموجوده هتعمل زى مسرحية الزعيم والا ايه؟؟؟
وبالنسبة لموضوع الحكم الملكى والعائلات انا مش شايف اصلا انه انتهى عشان يرجع لكن كان مختفى لحد فترة معينه لكن بدا يظهر ويطفو على السطح التانى لن برضوا مش بنفس الصورة البشعة بتاعة زمان اللى كان فيها ما يمكلكش الاراضى والدنيا كلها غير غير العائلات وده رايى البسيط فى حدود معلوماتى

هيثم جمال كتب:السلام عليكم يا أهل المنتدى
يا أهلا بالبرنس ضحية كرسي الاعتراف
عندي بعض الاسئلة وياريت تكون خفيفة عليك
س1 : الحياة معاك تسوى ايه ؟
س2 : مين اغلى شخصية عندك في حياتك كلها وبتعتبرها قدوة ليك ؟
س3 : انت في الوقت الحالي بيدور داخلك ايه ؟
س4 : انت بتحس انك طيب قوي بدرجة مبالغ فيها بالنسبة للبتشوفه حواليك ؟
س5 : بتتقبل النقد ولا ؟
س6 : مين من اصحابك نفسك متكلموش تاني ؟
س7 : انت رايح على فين ؟

1. والله الحياة عندى ما تسوى اى شىء بس ما دام عايشها باحاول اعيشها سعيد
2.هما اتنين والدى الله يرحمه واخى العزيز ربنا يخليهولى
3. مشاعر متضاربة عشان اليومين دول بالى مشغول بمليون حاجه
4. تامفروض انى ما اقولش كده بس فعلا انا طيب جدا واللى ممكن ياكدلك الكلام ده الادمين واستاذ احمد اسماعيل لانهم اصدقائى المقربين
5.اتقبله جدا وبصدر رحب
6.الحمد لله انا ما دام ليه صاحب يبقى اختارته وواثق فيه وعمرى ما ازعل منه ممكن نختلف لكن مانسيبش بعض
7.والله ما اعرف رايح على فين وربنا يستر

من طرف زهرة الثلاثاء يونيو 15, 2010 7:35 pm

لو كنت قاضى و جالك شخص تعتبره عدوك و ظلمك كتير قبل كده و كان مظلوم هل تعطيه حقه و لا تعاقبه على عدائك ليه و ظلمه ليك

من طرف فوكس الثلاثاء يونيو 15, 2010 9:42 pm

اهلا يابرنس الكرسى خلاك سياسى محنك
قولى بقى
1-لمن تقول له لم اكن اتوقع منك ذلك
2-لمن تقول الشخص المناسب فى المكان المناسب
3-لمن تعطى الكارت الاصفر
4- لمن تعطى الكارت الاحمر

من طرف عمرالناظر الثلاثاء يونيو 15, 2010 10:05 pm

ماهى نظرتك لازمة الثقة الموجودة فى مصر
و ما هى نظرتك للعلاقة بين الشعب و الشرطة
و ما هى نظرتك لاختيارات الوزراء و كبار المسئولين فى مصر

من طرف هيثم جمال الثلاثاء يونيو 15, 2010 10:36 pm

الاستاذ المحترم أحمد اسماعيل
نشكر تعليقك على الموضوع الخاص بحرية الأديان وعايز ارد على تعليق سعادتك بأن المنتدى ده يعتبر متنفس لينا - بالأدب - والمفترض ان فيه ديمقراطية في كل شئ واحب افند ردك في النقط التالية :
1- في البداية أحب اشكر قيادات الحزب الوطني على انهم قدروا يوصلوا رسالتهم في عقيدة كل واحد بإزاحة الدين مش من القلوب بس ولكن من خيالهم
2- وكمانا انا رحبت بالعضوة بصفتها ضيفة عزيزة شرفت المنتدى
3- في حقيقة مش عارف الناس نسيوها ولا مش عايزين يفتكروها علشان المشاكل احنا في بلد اسلامي والشريعة الإسلامية هي المصدر لكل التشريعات المقررة في البلد ولا يصح ان يصدر اي شئ او تمارش اية طقوس مخالفة للشريعةالإسلامية والكلام ده مش من عندي ولكن ده نص الدستور في المادة الثانية
4- وبعدين انت بتقول انك ستقوم بشطب الموضوع ده لو تكرر مرة ثانية انت فكرتني بمقولة لينين مؤسس الحزب الشيوعي لما عارضوه اصحابه في الحزب في الراي وفكروه بمبادئ الشيوعية وانه في حرية رأي فرد عليهم وقالهم انهم من حقهم يقولوا رأيهم ومن حقه إنه يحبسهم فكل بيستخدم حقه بحسب موقعه
5- وبعدين ده حرية رأي وأنا إتكلمت بدون عصبية ولكن أنا حبيت أتكلم من منطلق ايديولوجي بأن في وضع عام موجود منذ قديم الأزل وشايفين ناس بيحاولوا يغيروه لما حسوا أن شوكتهم قويت وده بيمثل لينا كناس بتفكر إستفزاز يعني كلام زي احنا اللي بنسمعه كان ممكن يتقال في وقت عزة الاسلام وقت اللي كان فيه اهل الذمة من النصارى واليهود امنين في بلادهم بل كان ليهم حماية من جانب المسلمين ومش عايز افكرك يا استاذي بحادثة الذمي اللي اقتص حقه من ابن والي مصر عمرو بن العاص من خلال امير المؤمنين آنذاك عمر بن الخطاب والكلام ده مش آثار دلوقتي ولا حتى تاريخ وخلاص لكن تعاليم دين لازم نحافظ عليه ومش نتجر ورا حجج مش نعلق عليها كتير
وفي النهاية مش حد يكون زعلان مني لأن الصراحة من المفروض مش تزعل اللي هي تكون بالأدب طبعاً وفي الأخر انا أكن لكل أفراد المنتدى وبحق الإحترام وكل تقدير وشكر على سعة صدرك لتقل كلامي

من طرف همام الناظر الثلاثاء يونيو 15, 2010 11:19 pm

لو لجأ اليك شخص يقول لك انه يشعر انه يكره زوجته و ان هذا الشعور جديد عليه و لم يكن يشعر به من قبل

تنصحه بايه

احمد اسماعيل كتب:اى سؤال عن الاديان و المعتقدات سأقوم بحذفه بصفة شخصية لاننى لن اسمح بأى فتنة فى ذلك المنتدى

الكبير كبير
و الادارة فن فعلا

هيثم جمال كتب:وبعدين انت بتقول انك ستقوم بشطب الموضوع ده لو تكرر مرة ثانية انت فكرتني بمقولة لينين مؤسس الحزب الشيوعي لما عارضوه اصحابه في الحزب في الراي وفكروه بمبادئ الشيوعية وانه في حرية رأي فرد عليهم وقالهم انهم من حقهم يقولوا رأيهم ومن حقه إنه يحبسهم فكل بيستخدم حقه بحسب موقعه

يا باشا اتكلم براحتك

و احنا من حقنا اننا نحبسك

عشان تعرف ان عندنا حرية مش موجودة فى مكان تانى

طبعا استاذنا الفاضل / هيثم بك جمال من الاعضاء الغاليين على المنتدى
اما بالنسبة لما قاله الاستاذ احمد اسماعيل
فهو يود ان يكون المنتدى بعيد عن صراعات من الممكن ان يكون ضررها اكثر من نفعها
اما بالنسبة لما طرحته انت
فان حرية الرأى مكفولة للجميع دون اى تدخل من ادارة المنتدى على الاطلاق
و لو تابعت كافة المنتديات خاصة المنتدى العام ستجد هجوما على كل قيادات الحكومة و المعارضة و حتى الرئيس مبارك و ابنه السيد جمال مبارك
و لا يوجد اى تدخل من الادارة على الاطلاق الا بابداء اعتراضنا على البيانات او المعلومات او الرأى و تكون مقارعة للحجة بالحجة و للرأى بالرأى
و لكن حينما نشعر ان الكلام قد يأخذ صيغة شقاق بين الاعضاء و قد يؤدى لهدم البيت على من فيه
فاننا نتدخل لضمان حسن العلاقات
خاصة ان المنتدى لا يزال فى بدايته و عمره لا يتجاوز شهرين و نصف و عدد اعضائه 111 عضو فقط
و نسعى جميعا ان يكون هؤلاء الاعضاء هم اسرة واحدة لا يوجد بينها اى ضغائن او مشاكل
و على سبيل المثال فانا قد اوقفت موضوعين كان الاخوين فوكس و احمد اسماعيل كانا يتبادلان الضحك و التهريج فيهما و كان الاعضاء يتخذونه وسيلة للفكاهة و لكنى شعرت ان اخى احمد اسماعيل بدأ يداخله ضيق فاغلقت الموضوعين و بعد ذلك اقسم لى احمد اسماعيل انه لم يغضب اطلاقا و كان فى قمة السعادة و طلب منى فتحهما مرة اخرى و لكنى قررت عدم فتحهما و الاكتفاء بالقدر الذى وصل اليه
بالطبع انا عندما فعلت هذا لم اكن اقصد ان اكبت حرية الاعضاء بقدر ما قصدت ان لا يحدث شقاق بين الاعضاء
بالاضافة الا اننا لسنا متخصصين بعلوم الدين و قد يكون دخولنا فى اى نقاش دينى ضارا للدين و ليس مفيدا لانى شخصيا سمعت من فضيلة الشيخ محمد حسين يعقوب تنبيه بعدم الانجرار للدخول فى مناظرات الا عندما اكون متحصننا بالعلم و يسمح لى احد الشيوخ الافاضل بذلك
و هذه ايضا هى فكرة اخيك احمد اسماعيل الذى يحرص مثلك تماما على المنتدى

زهرة كتب:لو كنت قاضى و جالك شخص تعتبره عدوك و ظلمك كتير قبل كده و كان مظلوم هل تعطيه حقه و لا تعاقبه على عدائك ليه و ظلمه ليك

المفروض ان القاضى بيحكم بالاوراق والدلائل والمفروض انه ما يدخلش الامور الشخصية فى الحكم اللى بيوقعه على اى شخص وانا كل اللى اقدر اقوله انا طبعى باحب التسامح وما باحبش ادخل الامور ببعضها ده فى حياتى العادية وفى حقوقى اللى لو اخدتها مش هاكون ظالم
فما بالك فى حكم يعتبر رد ظلم عن واحد وليه حق فاكيد هاردهوله لان انا بانظر لوضعه فى المشكله اللى قدامى والا ربنا هيحاسبنى لانى خالفت ضميرى
انا مش باقولك كده عشان انا ملاك بس لان الظلم ظلمات
وربنا يرحمنا جميعا ويجعلنا من عباده المتقين

فوكس كتب:اهلا يابرنس الكرسى خلاك سياسى محنك
قولى بقى
1-لمن تقول له لم اكن اتوقع منك ذلك
2-لمن تقول الشخص المناسب فى المكان المناسب
3-لمن تعطى الكارت الاصفر
4- لمن تعطى الكارت الاحمر

1. اقول كده لاى واحد امنته وخاننى
2. مش لاقى حد اقوله كده
3. لاى واحد يحاول يهيننى
4.لاى واحد خاننى او داس عليه

الاخ الفاضل عمر الناظر
1. بالنسبة لموضوع ازمة الثقه فى مصر فده من وجهة نظرى بالنسبة للقادة للوعود الكثيرة اللى بيوعدوها للشعب وما بتتحققش وكمان ان اللى بيدهولك باليمين بياخدوه منك بالشمال فى غلو اسعار وضرايب وكان انتشار الواسطة والرشاوى فى كل الدنيا واللى اكتر من ده كله اقرب الناس ليك وممكن يكونوا من دمك ولحمك بينهشوا فيك وبيخنوك فما بالك بالغريب وحاجات كتير فى الاراء الدينية ومظاهر الدين المختلفة حاجات كتير فما بقاش المظهر بيدل على الجوهر

الاخ الفاضل عمر الناظر
2. بالنسبة للعلاقة بين الشعب والشرطة اصبحت علاقة سية للغاية تغيرت الصورة السابقة التى كانت فى ذهن الناس واصبحت الشركة هى مسار خوف الشعب لما يفعله البعض فى هذه الطائفه من تجاوزات
ونحن نسمع كل يوم عن حوادث لاستغلال نفوذ هذه الفئة
كل يوم بنسمع عن الاهانات اللى بتحصل للناس من هذه الفئة واخرها موضوع حادث الاسكندرية
اصبحت هذه الفئة تنظر الى الشعب بلا احترام وكانهم عبيد لديهم
انتشرت فى الاونه الاخيرة تعاملتهم المهينة مع بعض المتهمين على الرغم انه المفروض يعامل المتهم او المجرم فى حدود جريمته وايا كانت جريمته المفروض الا يهينه ادميا والاغرب انهم يفتخرون بذلك وبيسجلوه على موبايلاتهم ده حتى الشعار اتغير غيروا شعار الشرطة فى خدمة الشعب

الاخ الفاضل عمر الناظر
3. بالنسبة لنظرتى لاختيارات الوزراء و كبار المسئولين فى مصر انا صراحة مش عارف اتكلم فى الموضوع ده لانى مش ملم بيه بس من وجهة نظرى انه فاشل والا كانت البلد دى بقت افضل من كده بكتير فكون البلد كده يبقى الوزراء وكبار المسسئولين فشلوا فى دورهم وبالتاى اختيار خطأ
والله اعلم

همام الناظر كتب:لو لجأ اليك شخص يقول لك انه يشعر انه يكره زوجته و ان هذا الشعور جديد عليه و لم يكن يشعر به من قبل

تنصحه بايه

اكيد قبل ما اقوله حاجه اكيد هاساله بعض الاسئله زى ايه سبب الكره هل من تصرفات منها _ هلى هى نكديه _ مش مدبره _ اسلوبها حاجات كتير واهم حاجه ليه فى الوقت ده بالذات هل فيه حاجه اتغيرت فى حياته فى نفس التوقيت ده حاجات كتيررر لان بناء عليها هاقدر احددله رايى وانصحه لان الاراء هتختلف من ظروف لظروف

من طرف مارسيل الأربعاء يونيو 16, 2010 6:19 pm

انا اعتقد ان كرستينا مش كانت تقصد انها بتتكلم عن رأيها في مطالب للاقباط
لان انا مثلا و كرستين دى بنت خالى و صاحبتى
مش شايفة اننا كاقباط ناقصنا مناصب
و انا شايفة ان النشاط التجارى للاقباط مفيد للوطن اكتر
انما ده ما يمنعش ان فيه كراهية بتزيد ناحيتنا مش كانت موجودة قبل كده
و ممكن يكون ده اللى مخوفنا
انما اللى يدايق فعلا هو الهجوم ده على كرستينا لمجرد انها سألت سؤال
و الغريب ان المتوجه ليه السؤال رد بدبلوماسية و شيياكة
اما الاخوة الى ادخلوه فى الموضوع كلامك كان مش حلو

من طرف مارسيل الأربعاء يونيو 16, 2010 6:32 pm

البرنس المصرى الشيك
ايه رايك فى مدارس الرقص الشرقى المنتشرة فى مصر الايام دى
و ايه رايك فى الرقاصين الى عايزين يعمله نقابة للرقاصين
و هل انت شايف ان ده نوع من الانحلال فى سلوك الشعب المصرى و لا دى استثناءات و مش تعبر عن الشعب المصرى
و ايه رايك فى السياحة فى مصرالى بتعتمد على الرقص و الكباريهات حتى فى الاعلانات الحكومية
و هل موضوع الرقص الشرقى و الحاجات دى هو السبب فى تراجع دور مصر الاقليمى
و هل اعتماد الاقتصاد المصرى على السياحة و خاصة السياحة المعتدة على الغرائز هى السبب فى عدم استقرار البورصة و لا فيه اسباب تانية
على فكرة ده موضوع بحث انا عملته فى الجامعة السنادى و اخدت فيه امتياز